Unser Topscorer Remo Tischhauser fährt mit dem Nationalteam von Liechtenstein an die WM-Qualifikation nach Estland. Dies konnte man bereit am Mittwoch im W&O nachlesen. Vor dem Abflug nach Estland konnten wir noch mit Remo sprechen.
Remo, du in de Nati vu Liechtestei? Wie got da?
I ha gad no eso viel liechtesteinischs Blut in mir, dases no langet …un es git halt nid eso viel Liechtesteiner wo hockeylen, soä bini dri grutsch.
Und din chline Brueder (Tres) het nid wellä gu?
De het ebe scho Ferie buechet. De züchts in hoeche Norde. De Kramer und de Lädi chönnten ono spiele, abr die hen (leidr) o kei Zit…
Uf was freusch di am meischte bi dere Quali?
Jo do gits mehreri Pünkt.
- Es isch cool, dasme weg em Unihockey mol in e aneres Land reise cha. Bis jetzt hani seb mit de Rangers no nid gschafft…nu amel bis uf Arosa
- De Hans seit immer, das di sebe Finne no guet spielen, es segi wie e aneri Sportart. Ez wetti selber mol wüsse öb da stimmt oder wiedr mol nu Seich gsi isch vum Hans.
- I ha i mim Vertrag en Länderspielbonus vu 100 Fr., seb isch no schöä.
Würggli? Stimmt seb mitem Vertrag?
Jop, i ha jo Afangs Joor min Vertrag ushandlet und die Klausle dri gnu. Si hend mi no usglachet und gseit i segi en glatte Cheib, für e Länderspiel werdi me us de 2. Liga nid ufbote. Abr do hani de Sportchef und de Präsi verwütscht!
Haha, guet für di! Ez hani no e paar entweder/oder Froge für di:
Liechtestei oder Schwiz?
Ou..schwirig…i muess ez Liechtestei säge, sus hani Chrach mit de Fründin.
Bier oder Wii?
En richtige Büezer trinkt Bier!
HCD oder Rangers?
Rangers, klar! Abr cool wär wemer de Arno del Curto an de Bande hetten.
Vegi oder Fleisch?
Fleisch….Brootwurscht nochem Match, ötschis bessers gits nid. Mol luege öbs seb in Estland o git!
Dangge Remo für das Gspröch. Demfall wünschen dir alli Rangers e super WM-Quali! Un will jo Prämiegeld überchunsch vum Verein, chasch du hüt obed s’Bier ins Training mitbringe.
Wer sich für die Spiele von Remo und der liechtensteinischen Nationalmannschaft interessiert, der kann sie online mitverfolgen.
http://www.floorball.org/pages/EN/Mens-WFCQ-2018-EUR1-Estonia
Spieldaten:
31.01. 19:00 Estland – Liechtenstein
01.02. 16:00 Liechtenstein – Finnland
02.02. 13:00 Liechtenstein – Polen
03.02. 11:00 Niederlande – Liechtenstein
04.02. 09:00 Liechtenstein – Belgien
Auf dem Youtube-Channel vom IFF können die Spiele live verfolgt werden.
https://www.youtube.com/user/iffchannel