Dr Hons het uf Endi letscht Wuche nomol zünftig id Werbetrummle grüehrt und alli motiviert: «Chunn nöchscht Wuche umbedingt i seb Konditraining is Püls ähi! Mir machen ötschis gonz bsunnerigs und zum Schluss giits denn no e Wuurscht zum Znacht.»
Und tatsächlich, s het denn würgli e Gruppe vu gonz herte Rangers gii, wo im sebe Regewetter i seb Püls ähi gradlet sin. Uhni, dassme mitenon abgmacht hetti, hettme sich denn ufem Weg troffe. E wiiters Indiz defür, wie guet dasses mir Grabser unerenonn hen! Uf jedefall simer denn alli döt djunne ahchuuu und hen scho vu wiitem en huufe oraschi Hüetli gseäh. «Die Hüetli kennemer jo langsam… Aber dr Hons het jo sichr o no ötschis speziells fr hüt Obet organisiert.», isch sich die chlii Ranger Gruppe ufm Drohtesel äinig. Un tatsächlich, womer djunne ahchuu sin, hemer e Hand voll Traktore Pnöö vorem Stall ligge gseäh. Üs allne isch schlagartig bewusst worde, was uf nis zuechuu wird und henn denn o no probiert zum wiedr drvuu fahre – der Sheriff, dr Hunn vum Hons, het nis denn aber uf sini Art chönne überzüge, no e chli z bliibe…
Womer denn halt döte gsii sin hemer nis denn o gseit: «chomm etz machemer halt e chli ötschis für üsi Konditiu – mir wenn jo schliesslich parat sii fr die onnere Teams wo wohrschindli nid e seweg bräit und vielsiitig trainiert worde sin!».
Dr Hons het denn s Training pünktlich gstartet und no gmäint, dassmer denn aber höere würen, wenns afieng z fest schieffe. Es sinn denn uf äimool gad alli Blick uf d Regewolgge looesgange, idr Hoffnig dasses oogebligglig afuu wür, abr s het nid welle. So simer denn halt ufne chlini Rundi, gschwinn chli gu jogge und üsi Glengg gu iiwerme. Seb isch abr o bitter nöetig gsii, will das wo nohher denn gfolgt isch, het doch so äiniges an Fertigkeite gforderet… Zum Glügg simer denn immerhin scho warm gsii und hen nis über seb nid o no sorge mache müesse!
Äi Disziplin isch gsii, dr Pnöö in Zwäierteams e paar Hunnert Meter dr Stross no ui z rolle, zumen denn am Ahaweeg jewiils abwechsligswiis e Hand voll mol z übercheähre. Die gonz junge hen denn n liechtere kriegt – aber sin idr Azahl o nid verschoent worde!
Noch paarne wiiitere Üebige, stanardmässige Sprints und Ummegumpeti ide Koordinatiuus Läitere, hets denn nomol e rundi Pnöö wörfe gii. Zum Abschluss hett denn en jede nomol acht mol dr Pnö übercheähre müesse. Seb ischt imfall nidemol so furchbar äifach gsi, abr mir sin nis am Schluss denn einig gsii, mit dr richtige Technik wärs sicher gonz «easy» gsi…
Nochdem dr offiziell Täil vum Training dori gsii isch, simer denn unner s Dach, chli ad Wärmi und henn uf üsi Wuurscht gwartet. Und promt hets denn gad agfange schiffe! So isch mr denn halt glich no e Wiili im Püls djunne verhogget – jo halt äifach bises ufghöert het mitem Schiff!